ಕೃತಜ್ಞತೆ!

ತೆರೆಯಮರೆಯಲಿ

ತರಳುತರುವಿನತೆರದಿ

ಪೊರೆವ ಜನನಿಯ ಋಣವ

ತೆರಲಿಹುದೆ ಎಣೆಯು

ಗುರಿಯನರುಹಿದ

ಗುರುಹಿರಿಯರನವರತ

ಗುರುತಿನಲಿ ನಮಿಸುವದು

ಗುರುತರದ ಹೊಣೆಯು

ಉಮೆಯ ಒಡೆಯನ

ರಮೆಯ ರಮಣನ ಹರಕೆ

ವಿಮೆಯಿರಲು ಇರುವಿನಲಿ

ರಮ ಮನದ ಮನೆಯು

ಅವನಿಯುಸಿರನು

ನೆವವಿರದೆ ನೆರವಿಗಿಡೆ

ನವಿರು ಬದುಕಿನ ಪಥವು

ಬವಣೆಗಳ ಕೊನೆಯು

ಅರಿಯದನುದಿನ

ಇರಿವ ನುಡಿಯನು ನುಡಿವ

ಅರಿಗಳಿಗೊಳಿತಿನೊಸಗೆ

ಹರಸುವದೆ ಕಣೆಯು

ತರಳುತರು = ತೆಂಗಿನಮರ, ಕಲ್ಪ ವೃಕ್ಷ

ಒಸಗೆ = ಉಡುಗೊರೆ

ರಮ = ಸಂತೋಷದಾಯಕವಾದುದು

ಕಣೆ = ಬಾಣ ( ಇಲ್ಲಿ ಪ್ರತೀಕಾರ ಎಂಬ ಅರ್ಥದಲ್ಲಿ ಬಳಸಿದ್ದೇನೆ)